Projekti trepalësh, Rama: Do ndërtojmë linjën nënujore të energjisë me Italinë

22:12 | 24 Shtator 2024
E.G

Kryeministri i Shqipërisë, Edi Rama ka bërë të ditur nga Nju Jorku se Shqipëria dhe Emiratet e Bashkuara Arabe po finalizojnë dy projektet e mëdha të energjisë si dhe krijimin e kompanisë së përbashkët të prodhimit energjetik.

Sipas kryeministrit, kjo kompani do të ketë portofol të ri ambicioz investimesh në Shqipëri në rajon dhe do të bëjë të mundur ndërtimin e linjës nënujore të transmetimin e energjisë me Italinë.

“Me mikun e çmuar Sultan Ahmed Al Jaber, Ministër i Industrisë dhe Teknologjisë së Avancuar të Emirateve të Bashkuara Arabe, për dy projektet e mëdha të energjisë që po finalizojmë bashkarisht, krijimin e kompanisë së përbashkët të prodhimit energjetik KESH&MAZDAR, e cila do të ketë një portofol të ri ambicioz investimesh në Shqipëri e në rajon dhe së dyti, ndërtimin e linjës nënujore të transmetimit të energjisë me Italinë, në një bashkëpunim tripalësh Shqipëri-EBA-Itali”, shkruan Rama në rrjetin social në Facebook.